Heilabrot endurhæfing - News

Smári Pálsson ráðinn framkvæmdastjóri

2024-01-01T14:20:00+00:00

Heilabrot hefur ráðið Smára Pálsson sem nýjan framkvæmdastjóra og klínískan stjórnanda.

Áramótakveðja Heilabrota

2023-12-31T18:00:00+00:00

Árið 2023 var mjög árangursríkt og við horfum fram á spennandi nýtt ár. Heilabrot þakkar öllum fyrir stuðninginn og hlakkar til að halda áfram að þróa og bæta endurhæfingarþjónustu fyrir einstaklinga með heilaskaða á komandi ári.

Samstarfssamningur við Andy og Ruth Tyerman

2023-11-23T10:45:00+00:00

Heilabrot hefur gert samstarfssamning við Andy og Ruth Tyerman, tvo virta sérfræðinga í endurhæfingu heilaskaða. Þessi samningur mun styrkja rannsóknir og þróun nýrra meðferða hjá Heilabrotum.

Heilabrot heimsækir Community Head Injury Service

2023-03-22T10:00:00+00:00

Heilabrot heimsótti Community Head Injury Service (CHIS) í Aylesbury, sem er leiðandi í samfélagslegri taugaendurhæfingu fyrir einstaklinga með heilaskaða. Þjónustan í Aylesbury er margverðlaunuð og hefur verið notuð sem fyrirmynd samfélagslegrar taugaendurhæfingar í Bretlandi. Heilabrot þakka kærlega fyrir kynningu á Aylesbury líkaninu og samstarfsvilja stjórnenda CHIS.

Heilabrot skoðar Oxford Centre for Enablement

2023-03-19T10:00:00+00:00

Við heimsóttum Oxford Centre for Enablement til að kynna okkur sérhæfða meðferð þeirra. Þessi heimsókn bauð upp á mikilvæga innsýn í þróun nýrra og árangursríkra meðferða fyrir fólk með heilaskaða.

Heilabrot á Headway House Basingstoke

2023-03-16T10:00:00+00:00

Fulltrúar Heilabrota heimsóttu Headway House í Basingstoke. Samfélagsleg taugaendurhæfing þar fer fram í heimilislegu umhverfi og öflugur hópur sjálfboðaliða styrkir það einstaka starf sem þar er unnið. Heimsóknin veitti okkur dýrmæta innsýn í þá möguleika sem opnast með samstarfi fagfólks og sjálfboðaliða í heilaskaðaendurhæfingu.

Heilabrot heimsækir Graham Anderson House

2023-03-14T10:00:00+00:00

Hópur frá Heilabrotum heimsótti Graham Anderson House í Glasgow en stofnunin er leiðandi í Bretlandi í endurhæfingu einstaklinga með alvarlegan hegðunarvanda eftir heilaskaða. Allir skjólstæðingar dvelja á stofnuninni og hluti endurhæfingarinnar fer fram í lokuðu úrræði. Við fengum kynningu á skipulagi endurhæfingarinnar, sem hefur skilað mjög góðum árangri.

Alþjóðlegi heilaskaðadagurinn

2023-03-01T08:00:00+00:00

Í dag, á alþjóðlega heilaskaðadeginum, leggur Heilabrot áherslu á mikilvægi þess að auka vitund og skilning á heilaskaða og þau áhrif sem hann hefur á einstaklinga og fjölskyldur. Við hjá Heilabrotum munum bjóða upp á fjölbreytta viðburði sem miða að því að fræða almenning og styðja við þá sem hafa orðið fyrir heilaskaða. Þessi dagur er mikilvægt tækifæri til að sameina krafta okkar í baráttunni fyrir betri lífsgæðum fyrir alla þá sem lifa með afleiðingum heilaskaða.

Brimborg styrkir Heilabrot um 6 milljónir króna

2022-12-30T13:57:53+00:00

Brimborg hefur veitt samfélagsstyrk upp á sex milljónir króna til nýstofnaðrar sjálfseignarstofnunar, Heilabrota endurhæfingar, sem sérhæfir sig í endurhæfingarmeðferð fyrir einstaklinga með heilaskaða í þeim tilgangi að bæta lífsgæði þeirra. Stofnendur Heilabrota eru Fanney Þórsdóttir, Emil Harðarson, Þór Sigurbjörnsson og Þuríður Björnsdóttir en þau eru aðstandendur ungs manns með heilaskaða. Smári Pálsson, sérfræðingur í klínískri taugasálfræði, og Ólöf H. Bjarnadóttir, tauga- og endurhæfingarlæknir, koma einnig að starfinu en bæði hafa þau áratugareynslu af endurhæfingu eftir heilaskaða. Dr. Andy Tyerman, klínískur taugasálfræðingur og leiðandi ráðgjafi í heilaskaðaendurhæfingu í Bretlandi, starfar einnig með Heilabrotum að uppbyggingu þjónustunnar hér á landi. Samstarf verður einnig við stjórnendur og sérfræðinga við Center for Hjerneskade í Danmörku.

Stofnendur Heilabrota, þau Fanney Þórsdóttir og sonur hennar Emil Harðarson, ásamt Margréti Rut Jóhannsdóttur, mannauðsstjóra Brimborgar, við styttu Leifs Eiríkssonar þar sem sonur Fanneyjar og bróðir Emils fékk alvarlegan höfuðáverka. Slysið varð kveikjan að stofnun Heilabrota, sem er nýtt úrræði fyrir fólk með heilaskaða.

„Þetta byrjaði með því að sonur minn, bróðir Emils, lenti í slysi og hlaut alvarlegan heilaskaða. Hann er enn fremur í þeim hópi sem fær nánast enga endurhæfingu hérlendis. Hann er m.a. með framheilaskaða sem veldur því að hann hefur skerta dómgreind en þjónusta Heilabrota felst m.a. í því að kenna fólki með heilaskaða dómgreind upp á nýtt,“ segir Fanney Þórsdóttir.

Þörf fyrir sérhæfða endurhæfingu eftir heilaskaða er mikil þar sem stór hluti þeirra sem hljóta heilaskaða glímir ekki einungis við líkamlega skerðingu heldur einnig við hugræna skerðingu eins og minnisvandamál, skerta einbeitingu, innsæisleysi og dómgreindarleysi. Þessari skerðingu getur fylgt hegðunarvandi. Þó svo að þessi fötlun sjáist ekki endilega utan á fólki þá getur hún haft alvarlegar afleiðingar, m.a. valdið því að fólk getur ekki unnið eða verið í námi, fjölskyldu- og vinasambönd slitna og fólk einangrast félagslega. Eins og gefur að skilja eru lífsgæði þessara einstaklinga verulega skert. Hefðbundin úrræði hér heima ráða ekki við fólk sem glímir við þennan vanda og þá er ekkert í boði. Sumir lenda því í rauninni á götunni og jafnvel í fangelsum, en þetta er m.a. ástæðan fyrir því að Fanney og Emil fara af stað með starfsemina að erlendri fyrirmynd.

Hvað er heilaskaðaendurhæfing?

Heilaskaðaendurhæfing hvílir á svokölluðum sveigjanleika heilans (neuroplasticity). Í heilanum eru taugafrumur sem tengjast og mynda taugavefi. Sveigjanleiki heilans byggist á hæfni hans til að mynda ný tengsl á milli taugafrumna. Slík tengsl, sem myndast sérstaklega á þroskaskeiðum bernskunnar, verða til alla ævi þegar fólk lærir eitthvað nýtt.

Skaði á taugavef í heilanum getur til dæmis valdið því að færni til að ganga tapast. Sveigjanleiki heilans gerir það að verkum að nýr taugavefur getur myndast ef einstaklingur með slíkan skaða er þjálfaður í að ganga með aðstoð hjálpartækja. Fótahreyfingar verða til þess að taugaboð eru send til skemmda svæðis heilans, þar sem virkni er skert, en boðin berast til nærliggjandi taugavefja, sem eru óskaddaðir. Ný tengsl myndast þannig á milli taugafrumna. Með áframhaldandi stöðugri gönguþjálfun í langan tíma stækkar nýja tauganetið og eftir ákveðinn tíma þarf einstaklingurinn ekki sérstakan stuðning eða að beita allri sinni athygli til þess að ganga. Skaði á taugavef annars staðar í heilanum, til dæmis framheila, getur valdið því að annars konar færni tapast. Þar má nefna getuna til að stjórna tilfinningum eins og reiði, hæfileikann til að setja sig í spor annarra og hæfnina til að hugsa fram í tímann og skipuleggja gjörðir sínar. Slík færni er auðvitað grundvöllur hegðunar sem er félagslega viðeigandi fyrir fólk sem hefur náð fullorðinsaldri. En í stað þess að efla hreyfingu þarf að þjálfa viðkomandi í að hegða sér á viðeigandi hátt. Stöðug þjálfun í viðeigandi hegðun í langan tíma býr hægt og rólega til nýja taugavefi. Með þjálfuninni verður æskileg hegðun að vana og einstaklingurinn þarf ekki að hafa fyrir henni. Heilaskaðaendurhæfing krefst því þess að þjálfun einstaklingsins sé stöðug yfir langan tíma. Nýir taugavefir myndast einungis við mikla og langvarandi þjálfun.

Hægt að komast aftur á vinnumarkað með endurhæfingu

„Við höfum skoðað stofnanir sem sérhæfa sig í endurhæfingu eftir heilaskaða í Kanada og Danmörku og erum að fara til Bretlands til að kynna okkur heilaskaðaendurhæfingu þar. Við ætlum að þjónusta mjög breiðan hóp fólks með heilaskaða, sem þarf að glíma við breytilegar áskoranir yfir langan tíma,“ segir Fanney. Endurhæfingarþarfir einstaklinga með heilaskaða breytast með tímanum. Heilabrot stefna á að þjónustan nái yfir hópinn frá því að skaðinn verður og þangað til fólk er tilbúið til að fara út í lífið og lifa sjálfstæðu lífi. Verkefnið er verulegt því talið er að um tvö þúsund manns hljóti svokallaðan ákominn heilaskaða á ári á Íslandi, misalvarlegan þó, en í þessum hópi er fólk sem verður fyrir slysum jafnt sem fólk sem fær heilablóðfall. Hjá flestum lagast færnin mjög hratt en talið er að 10% hljóti alvarlegan skaða sem þarf að meðhöndla með langtíma meðferð. „Erlendis eru tölurnar mjög jákvæðar fyrir bata, í Danmörku er t.d. í boði stíf tveggja mánaða meðferð fyrir fólk sem er langt komið í sínum bata en þessi endurhæfing, sem er allan daginn og með mikilli eftirfylgni, gefur þann árangur að átta af hverjum tíu verða fær um að fara aftur á almennan vinnumarkað,“ segir Emil. Árangur heilaskaðaendurhæfingar í Bretlandi hefur verið sambærilegur og í skýrslu sem unnin var af sérfræðingum á vegum breska þingsins þar sem komist var að þeirri niðurstöðu að heilaskaðaendurhæfing væri ein arðbærasta meðferð bresks heilbrigðiskerfis. Það er dýrt fyrir íslenskt samfélag þegar fólk með heilaskaða fær ekki viðeigandi endurhæfingarmeðferð. Heilabrot hyggjast því bjóða upp á meðferð, sem er sambærileg við þá meðferð sem boðið er upp á erlendis, þ.e. heildstæða langtíma meðferð sem nýtir viðgerðarhæfni heilans.

Styrkur Brimborgar er veittur með hliðsjón af heimsmarkmiði Sameinuðu þjóðanna nr. 3, sem fjallar um heilsu og vellíðan, en einnig á grunni slagorðs Brimborgar, „Öruggur staður til að vera á“.

Gleðileg jól frá Heilabrotum

2022-12-24T08:00:00+00:00

Heilabrot sendir ykkur hlýjar hátíðarkveðjur! Við óskum öllum gleðilegra jóla og farsæls nýs árs.

Heilabrot stofnað - Nýtt upphaf í heilaskaðaendurhæfingu

2022-10-05T09:00:00+00:00

Heilabrot, ný stofnun í endurhæfingu heilaskaða, var formlega stofnuð í dag. Markmið Heilabrots er að veita framúrskarandi þjónustu og stuðning við endurhæfingu einstaklinga með heilaskaða. Stofnunin byggir á arfi fyrri hóps sem bar sama nafn og leggur áherslu á nýjar, gagnreyndar meðferðir.

Heilabrot í Kaupmannahöfn

2022-09-22T16:00:00+00:00

Fulltrúar Heilabrota heimsóttu Center for Hjerneskade í Kaupmannahöfn, sem sérhæfir sig í taugaendurhæfingu fyrir fólk með heilaskaða og er leiðandi á því sviði í Danmörku. Við fengum kynningu á sögu starfseminnar, uppbyggingu og fjármögnun. Við fengum auk þess ítarlega kynningu á skipulagi endurhæfingarinnar og á tengslum við kennslu og rannsóknir í taugaendurhæfingu. Í heimsókninni var okkur boðið í skoðunarferð um stöðina og gafst okkur tækifæri til að sjá hvernig dagleg starfsemi fer fram hjá stofnun sem sýnt hefur framúrskarandi árangur í endurhæfingu eftir heilaskaða.

Center for Hjerneskade fjallaði um heimsóknina: Island vil lære af vores rehabilitering